Бас ауруы қашан мәселеге айналады

Мына жағдайлардың кем дегенде біреуі сізге таныс болса, неврологқа көрінген жөн:

  • бас аптасына бір реттен жиі ауырады немесе барған сайын жиілеп келеді;
  • ауырсынуды басатын дәрі аптасына екі реттен көп керек болады, ал әсері бұрынғыдан әлсіз;
  • ауырғандықтан істеріңізді кейінге қалдырасыз, жұмысқа бармай қаласыз, нашар ұйықтайсыз;
  • ауру өзгерді: күшейді, ұзаққа созылатын болды немесе басқа жерге ауысты;
  • онымен бірге бас айналу немесе құлақ шуылы пайда болды.

Бас кенеттен, бұрын-соңды болмағандай қатты ауырса, бұл басқа жағдай. Ондайда жазылуды күтпеңіз: көмек бірден керек.

Бас неге ауырады: жиі кездесетін себептер

  • Кернеу түріндегі бас ауруы. Екі жағынан қысып, тар шеңбер кигендей болады. Көбіне күйзеліске, ұйқының қанбауына және компьютерде ұзақ жұмыс істеуге байланысты.
  • Мигрень (бас сақинасы). Соғып ауырады, көбіне бір жағынан, жарық пен шудан күшейеді, жиі жүрек айнуымен бірге жүреді.
  • Дәріні жиі ішуден болатын ауру. Ауырсынуды басатын дәріні айына 10–15 күннен көп ішсеңіз, дәрінің өзі ауруды ұстап тұра бастайды.
  • Мойыннан келетін ауру. Шүйдеден басталып, басты бұрғанда күшейеді. Бұл туралы мойын ауруы жөніндегі мақалада жазылған.

Неге шыдап жүре бермеген жөн

Дәрі ұстаманы басады, бірақ себебін жоймайды. Ауру қайта оралады, уақыт өте дәрі көбірек керек болады, ал мұның өзі ауруды ұстап тұруы мүмкін. Адам біртіндеп өмірін бас ауруына бейімдей бастайды: кездесулерден бас тартады, нашар ұйықтайды, кез келген шудан шаршайды.

Аурудың қандай екені анық болғанда, жоспар да нақтыланады: ұстама кезінде не ішу керек, күн тәртібінде нені өзгерту керек, алдын алу үшін дәрі керек пе. Көп адамда бұдан кейін ұстамалар сирейді.

Невролог бас ауруының себебін қалай анықтайды

Дәрігер бас қашан және қалай ауыратынын, қандай дәрі ішетініңізді сұрайды, содан кейін неврологиялық тексеру жүргізеді: рефлекстерді, күшті, сезімталдықты, қимыл үйлесімін және мойын қозғалысын қарайды. Қабылдаудан емдеу жоспарымен шығасыз және не болып жатқанын түсінесіз.

Жиі қойылатын сұрақтар

Бас ауырса, қай дәрігерге бару керек?

Неврологқа терапевтсіз-ақ бірден баруға болады. Басқа маман керек болса, ол қайсысы екенін айтады.

Бас ауырса, дәл қазір не істеу керек?

Тыныш әрі қараңғы жерде біраз болыңыз, су ішіңіз, бөлмені желдетіңіз. Ауырсынуды басатын дәріні жиі ішпейтін болсаңыз, ішуге болады. Бұл қайталана берсе, неврологқа көрініңіз.

Ауырсынуды басатын дәріні күн сайын ішуге бола ма?

Ішпеген жөн: айына 10–15 күннен көп ішкенде дәрінің өзі ауруды ұстап тұра бастайды. Дәрі аптасына екі реттен жиі керек болса, неврологқа көрініңіз.

Бас ауырғанда МРТ жасату керек пе?

Әрқашан емес. Әдеттегі мигрень немесе кернеу түріндегі ауру кезінде, тексеру қалыпты болса, сурет көбіне жаңа ештеңе қоспайды. Зерттеу керек пе, дәрігер тексергеннен кейін шешеді.

Бас ауырып, жүрек айнуы қауіпті ме?

Көбіне мигрень ұстамасы осылай өтеді. Мұндай жағдай алғаш рет болса немесе барған сайын жиі қайталанса, неврологқа көрініңіз.

Материал ақпараттық сипатта және дәрігердің бетпе-бет кеңесін алмастырмайды. Нақты диагноз тек тексеруден кейін қойылады.